iris님의 프로필千足純金之家歡迎大家光臨, 請隨便參觀, 歡迎留...사진블로그리스트기타  |  도구 도움말 |
|
6월 29일 最大的損失見到kitty 講d鄰居對狗嘅態度, 我又醒起早兩日有d好笑野.
話說早兩日朝早放狗經過屋苑公眾地方時, 都有個呀嬸同個大約3歲嘅孫仔講: 唔好行埋去呀, 如果唔係一陣隻狗咬你.
我果時聽到好興, 想發難架啦, 但因為有小朋友係度我唔想比佢有壞印象,
於是我即刻同呀嬸講: (仲要面帶笑容)佢地唔咬人架, 好乖架. 跟住叫佢地lingling chacha 即刻sit 晒定定咁.
好奇怪又好好笑喎.......呀嬸竟然話: 唔咬人呀, 咁快d 摸吓佢地啦. 跟住捉住佢個孫隻手係咁摸佢2個.
仲摸到好誇張, 直情抽晒水, 之後仲熊抱鈴鈴. 我心諗: 死o靚仔博懵呀! 又心諗: 呀嬸你都好極端吓喎!!
見到個孫仔由初初聽呀嬸講話隻狗會咬你個驚恐樣, 到後尾摸狗狗開心到"kaka" 笑,
真係覺得, 如果d人對狗狗有驚恐症, 佢地個世界真係失去好多歡樂,
佢地無機會認識到狗狗.........人類最好的朋友, 將會係佢地一生之中最大的損失. 6월 28일 豆豉眼JJ 有一雙小眼睛, 是烏黑的, 小小的, 但不失精靈活潑.
Ringo 稱之為豆豉眼, 呵呵.
JJ 的一雙眼睛, 純黑黝黝, 一雙眼睛令人有神秘的感覺.
看著她, 忽然想起, 從前查查跟DIamond 的眼睛好像也沒現在般大而明亮, 不知JJ 將來眼睛會否變得大一點?
相由心生, JJ 不久的將來對這個家的信心多一點, 自信心亦多一點點, 精神奕奕過著每一天, 眼睛自然明亮似天上繁星.
JJ, 你也要快點成為大眼妹啊.
6월 26일 animal communication上左2堂, 要努力.
第一日, 自己好有信心, 覺得自己好有力量, 做出黎個效果都覺得幾好.
第二日, 自信心唔知去晒邊, 可能個人好攰, 好無精神, 亦做得好差, 咩都睇唔到, 完全係自己亂黎, 有挫敗感.
今日, 收到同學仔email, 好似有番d力量, 好....一陣望吓個天, 同d樹傾吓計先.
6월 23일 心跳今日帶4個女去青譽街狗公園, 果度真係一個好地方,
但礙於查查係果度有多次走狗經驗, 所以而家都好少去.
但未同JJ去過, 想比佢去吓, 喪跑吓, 聞吓草地. 好....今日一於去狗公園.
查查全天候無得放繩, 媽媽唯有將幾條拖繩扣成一條長leash, 比佢有限度的活動.
而其餘三位小姐都可以自由活動, 去邊都得.
JJ 好開心呀! 佢四處聞, 又四圍提腳尿尿, 尿左好多地方呀.
仲跟Diamond 四圍跑, 但又唔會跑遠喎,
久不久又番黎媽媽身邊, 真係好女兒.
天氣熱, 好索氣, 飲d 水, 玩一陣, 就番屋企啦.
回家, 由停車場上地面, 出lift.
不遠處, 我見到JJ 以前主人一家, 係全家連傭人企係二座對開.
我心一熱, 感覺似自己係第三者, 搶左人地老公咁, 唔想比佢地見到我地!
JJ 會唔會見到佢地呢? 佢地又會唔會見到JJ 呢?
唯有硬著頭皮走出草坪走回家的路.
急速的步伐低著頭默默走過, 心跳得不得了.
走呀走, 看著JJ, JJ 亦看看我.
走到一座大堂門前, JJ 笑了.
就好像向我說道: 媽媽我要跟你.
我眼眶一熱, 摸摸她的頭, 獎勵了一塊雞肉給我的好女兒JJ, 我們一起回家吧.
6월 21일 重拾初戀感覺晚上成十點幾, 赫然發現屋企無晒diamomd 嘅heartguard plus, 加上要去還碟, 拿拿聲出去荃灣睇吓重有無獸醫診所重開門.
正當換衫之際, 見到小鈴鈴個樣好似好唔捨得我地, 好啦.....帶埋鈴鈴一齊去啦.
出門口, 查查有條條食, JJ 有條條食, Diamond 都有條條食, 淨係鈴鈴無得食,
梗係啦, 你要跟爸爸媽媽去街街呀.
小鈴鈴有點驚訝, 點解我無得食,
媽媽又叫我跟住出門口, 跟啦!
出門後鈴鈴晃然大悟: 原來媽媽帶我去街........淨得我.....得我一個,
無查查, diamond 同jj, 得我一個, 好開心!
小鈴鈴裂嘴大笑, 個樣同平時去街個開心樣好唔同, 有甜蜜的感覺.
而媽媽亦感受到好似以前鈴鈴小時候只得鈴鈴一個女兒時同爸爸於夜深帶鈴鈴去街街一樣,
呢種感覺好特別, 好幸福, 就好似初戀一樣.
我相信小鈴鈴的感覺也一樣.
去街街, 媽媽特別陪伴鈴鈴坐於後座,
小鈴鈴亦馬上咋嬌, 依偎在媽媽的懷抱.
到荃灣的路程略嫌太短, 未能盡情與小鈴鈴擁抱.
到達目的地, 與小鈴鈴行了一圈,
途中也有遇到一班狗友, 狗狗互嗅幾吓, 主人寒暄幾句, 道別了.
狗狗們當中亦有對鈴鈴很有興趣似的, 但鈴鈴很淡定啊, 很有大姐風範, 鈴鈴太乖女了.
回家了, 又是媽媽跟鈴鈴依偎互相傾訴的好機會.
下車, 也別上繩了, 跟媽媽走走草坪, 跟爸爸追逐嬉戲一下吧.
只與小鈴鈴在一起時, 感覺很獨特, 很微妙.
石澳今日帶4 個女去石澳游水. 小鈴鈴已經差唔多2年幾無去過石澳,
今日舊地重遊, 佢好似好認得咁, 係咁搶繩帶路.
今日後灘d水麻麻地, 可能風向問題, 但唔緊要啦, 都係咁玩!
一如以往, 小鈴鈴都係樽樽水怪, 係咁落水擔水樽, 落水擔水樽.
JJ 今日係第一次同我地去游水, 唔知佢以前有無試過游水呢?
佢當然唔敢落水啦, 抱佢落水, 就好似遇溺咁大水花地游上岸.
雖然佢唔Enjoy 游水, 但有個大沙灘比佢喪跑, 佢都好開心.
而查查今日好似知道JJ 第一次游水唔識游, 就懶叻咁係度游來游去,
仲夠膽游去深水處, 如果平時!! 佢只會係岸邊浸吓腳.
而小Diamond 呢? 咪做查查跟班囖. 查查去邊, 佢就跟住去邊,
查查游去深水, 佢都游去深水.
番屋企, 同4個大小姐沖涼, JJ 沖最後.
終於見到JJ 的潛在光芒, 身上無甩毛的地方立立令.
雖然身上重有好多地方d毛都未生出黎, 重係一躂躂,
但已經見到好多短毛生緊出黎, 重好"吉"手,
相信JJ 好快就可以毛茸茸, 全身黑"mung mung".
可以加入靚女行列.
好期待呢一日. 6월 18일 一盒康圖就咁無晒見到JJ D便便有潺, 似有虫虫徵兆, 晚上立即同佢杜虫.
一隻食開, 不如4位大小姐一齊食啦.
打開櫃桶, 見到有盒新的, 心諗: 屋企物資都好充裕.
計一計, 2粒半, 2粒半, 2粒, 3粒, 啱啱好十粒,
一夜之間一盒康圖就咁無晒.......,
心中大叫: 又要繼續努力工作賺多d錢,
如果唔係呀女生虫無$杜虫就敝啦. 6월 17일 武林高手Diamond 而家同 JJ 日日都玩到顛晒, 攬頭攬頸,
由疏化跳落地再跑去墊墊再跳上窗台, 二狗身影飛快似鬼魅,
看得我同RINGO 目瞪口呆, 好似見證著兩位武林高手正在比武,
而佢地亦好似高手般總是點到即止, 絕對唔會有流血事件發生.
之前查查見到JJ同Diamond 玩時, 佢以為JJ 蝦小DiDi, 緊張到想打JJ 咁滯,
但媽媽當然阻止查查, 仲要安慰佢話佢知JJ同Diamond 只係玩緊, 唔洗緊張.
而家, 當佢地兩位比武時, 查查只會懶洋洋地望住佢地,
有時洽吓眼瞓, 有時又睇吓佢地點, 有時又笑笑口望吓我好似好得意咁.
而以前小Diamond 好鍾意撩鈴鈴玩, 但鈴鈴礙於先天不足,
佢一定唔夠DiDi 玩, 我亦會阻止Diamond 同鈴鈴玩得太劇烈,
怕鈴鈴會受傷. 而家, 有JJ 同Diamond玩, 鈴鈴可以置身於度外,
唔洗比小diamond 煩住晒, 真係好.
有JJ同Diamond 兩位孖寶, 家裡真的熱鬧不少.
佢地每日都開心係咁玩玩玩, 武藝一日比一日高強, 功力亦一日比一日更深厚.
6월 14일 一拖四自JadeJade 加入我地大家庭, 到今日終於到我正式對住4位千金, 要單獨自己去處理佢地帶佢地落街.
之前未確實要帶jj 番屋企之時, 我就係擔心我拖唔住4隻狗, 要分開2次落街, 咁workload 會大好多.
今日終於要試一次, 趁下晝流流, 人應該唔太多, 即管試一試.
逐隻上繩, 趁機同佢地講要守秩序, 要乖乖唔好搶繩.
出門口, 鎖門.
查查一行到lift 口即刻自動sit 好, 鈴鈴亦然. 媽媽立即大加讚賞good girls!!
再問一問: diamond 有無坐好? 小didi 隨即亦做到. good girl!
咁jj 呢??? 媽媽嚴肅地叫道: "JJ, sit 好!" JJ又馬上乖乖就範啦.
全部都係媽媽的好女兒, good!!!
Lift 到, 入去, 之前的sitsit再做一次.
出Lift, 全部要Stay 好. 望一望出面無人, OK, let's go!!
4位小姐都行得好好, 有JJ 係度, 小Diamond 竟然反而唔搶繩, 呵呵!
到放狗區, 一切正常.
放開查查, 佢反而無四圍走, 仲比平時"痴"腳,
點會咁? 一切都好似太美好,
回家, 途中亦無意外, 今日實在太理想,
有點不能相信會事情係咁簡單.
今日係佔人和, 無其他人同狗狗騷擾同影響佢地嘅行為.
下一次可能會有其他因素出現而影響到佢地唔守秩序.
我要繼續努力去留心去留意周圍, 要比佢地更早發現所有引起混亂嘅禍根,
媽媽, 你要努力!!! 大板牙JJ同JJ 刷牙, 見到佢前排d牙齒係4個女之中最大隻同最整齊,
上下顎齊輯輯, 牙齒隻隻係最佳位置, 咬合近乎完美.
唐狗真係有好多靚嘅地方有待我地去發掘.
話雖如此, 一打開入面D大牙好多牙石, 又"黑媽媽""黃琴琴".
不過都預左會係咁, 唔緊要, 媽媽同爸爸都會日日同佢刷牙,
咁就可以好似查查而家咁 D牙齒潔白兼無口氣啦.
同JJ刷牙, 佢都無好抗拒, 只有少少唔習慣,
張開佢個口, 好似知道刷完牙會好舒服咁!
的確係嘅, 狗狗真係知邊個錫佢, 邊個對佢好.
佢知你對佢好, 無論幾驚幾唔願意,
佢地都會乖乖就範, 絕對服從100%信任.
6월 12일 Jade 的故事6월 10일 玉不琢不成器Jade, 你的名字是碧玉, 你是一頭唐狗, 可愛的唐狗.
縱使你身上披毛一向稀疏, 凋零得令人心酸, 而且滿身油膩,
不知被前主人塗抹了甚麼似的在身上.
但你隨和乖巧的性格, 卻不時在我與ringo 的心中佔一席位.
我們更不時提及你身上粘呼呼的原因:
是否前主人生產bb後, 怕你丟毛而把你的毛通通"gel" 起來?
因此而令你有皮膚敏感.
還是你前主人產後已對你不再有興趣,
亦不如以往般時常帶你到處去玩,
因此你焦慮了, 你心理上要自己不斷搔癢,
令自己原本豐厚的毛髮也脫光了.
今後, 你要好好生活啊, 新媽媽答應會給你豐盛的生活, 讓你連搔癢的時候也沒有.
你很快便可以成為一頭有潤澤亮麗閃閃發光的黑毛狗狗, 就好像查查般, 全身散發著聖潔的光輝.
Jade, 是你讓我們一家可以成大器, 晚成一點也不打緊,
我們一家人可以開心快樂地過日子, Jade, 你願意嗎?
6월 8일 忌水據陳太引述, 呀財(查查以前的名字)流浪時曾經生育過一胎幼犬, 但所有狗嬰兒也給 ”人” 吃掉了. 而宰殺過程是要先將小狗兒溺斃, 因此, 查查每次見到有很多水時便十分驚恐. 但隨著時間流逝, 查查現在就算水龍頭花灑從頭淋起, 只要有媽媽在, 她也不會害怕了.另外, 有次媽媽買了幾隻一按會發聲之塑膠小豬給予鈴鈴查查作玩具, 查查二話不說竟將所有小豬據為己有, 平時她對玩具是不屑一看的, 而鈴鈴沒有玩具亦沒多大的所謂,(她只愛黏著人便行了.) 因此我亦由得查查自己玩她心愛的小豬玩具. 不一會, 我竟發現查查將小豬逐隻逐隻排列整齊於自己懷裡, 還不時輕輕舐著玩具小豬. 噢!!!! 我心中想著, 查查你是否正懷念著你逝去的兒女? 我不禁悲從中來, 心中念著一個盟誓: [查查, 媽媽要你永遠得到幸福, 永遠不再悲傷流淚, 要永遠快樂地生活. 查查前傳-呀財
從呀財前主人陳太口中得知, 呀財是大埔醫院附近的流浪犬. 而當時正直03年2-3月左右, 亦即sars 爆發期間, 陳太於附近工作, 由於見呀財於附近流浪, 心生憐憫, 於是便不時帶食物給予呀財, 心想就算做隻流浪犬也不要做挨肚餓的流浪犬吧. 時間一天一天的過, 呀財亦慢慢跟陳太建立起感情來. sars期間人人也戴上口罩遮住臉龐, 呀財也一定認得陳太, 每當陳太遠遠出現時, 呀財便一支箭般飛快地跑到陳太跟前, 向她示好, 而陳太得到呀財的信任, 亦甚為歡喜
但好景不常, 陳太不久便給裁員了. 最後上班的一天, 亦是陳太餵飼呀財的最後一餐狗飯, 當時呀財一邊吃, 陳太一邊問呀財, 道: [呀財, 我以後黎唔到啦, 不如你跟我番屋企, 唔好做流浪狗啦.] 呀財好像聽得懂似的, 不停搖著尾巴. 就這樣, 呀財便成為陳太家中一份子. 但由於陳太家中狗狗的數量也不少, 論資排輩, 查查新來便新豬肉, 不時也被其他狗欺負. 但也沒法子, 成年的唐犬真的送人也沒有人要. 所以縱使環境是擠迫一點, 但總算也有個家, 於是呀財便居於陳宅. 查查的故事未養查查前, 我和 ringo還未懂得領養狗狗的好處. ringo想養多隻黑色的lab, 而且仲係諗住由bb養起. 但我自己就想養隻小型或小至中型犬例如積羅素. 因為我驚照顧2隻大狗會好辛苦, 而且小型或小至中型犬會較容易打理. 另外我唔想本身第一隻狗- 鈴鈴覺得地位受威脅, 始終鈴鈴以lab來講體型唔算大, 我驚將來體型較大的新狗狗會挑戰鈴鈴的地位, (我當時好偏心,但當時我只有鈴鈴一個女兒.)
查查已經通過漁護處舉辦的大型狗隻豁免規管考試, 考試合格並証明服從性良好. 誰說收養成年犬管教會很困難? 誰說唐狗一定淨係識看門口? 而稍後, 查查還開始參與狗狗義工的工作希望可以造福社會, 服務人群. 看!! 一頭曾經流浪的狗狗也可以過有意義的生活, 誰說流浪犬的生命沒有價值?
|
|
|
