iris님의 프로필千足純金之家歡迎大家光臨, 請隨便參觀, 歡迎留...사진블로그리스트기타  |  도구 도움말 |
|
8월 26일 悼文得知大啡事件已有好幾天, 一直不願面對, 要待自己心理調整後, 才鼓起勇氣打開Labclub 內文. 大啡....就像不羈野馬般愛好自由, 一直不甘於平淡. 強悍的他一直追求自我驚世駭俗的生活, 亦不願苟且於別人籬下. 今天大啡覺得疲倦了, 要歸於平淡, 要躺下來了. 就讓自身成為玉碎亦不願作瓦全. 今日diamond 的情況朝早起身, 立即檢查diamond 眼仔. 咦!! 好似無左血紅色, d血散左, 又無腫喎!
個心即刻定d.
ringo 餵佢食糧食藥, 滴眼水,
打電話去太平道約眼科周醫生睇diamond,
再叫自由道fax個病歷紀錄去.
下晝, 太平道約 ringo 聽日11:00 睇症,
希望可以作一個詳細d嘅檢查,
另外salina 亦介紹一個眼科陳醫生註診係徐正雄診所的.
諗住如果真係要做手術的話就睇多個專科,
但如果check 完話無大礙咁就可以唔洗睇.
diamond.......媽媽支持妳!! 你要努力呀!!
8월 25일 Diamond 你要無事呀!!很不願意寫這篇部落格, 小小diamond 今天發生意外.
 經過昨天晚上灑下夜雨, 今天天氣風和日麗,
空氣好極了,氣溫亦不高, 最適宜帶女兒郊遊.
懷著輕鬆愉快的心情, 帶著兩頭小山狗 diamond 跟 JJ 一同往青衣自然徑出發吧.
走呀走, 跑呀跑, diamond 和 JJ 都開心得跳起, 快樂啊!
樂極生悲!!
小山狗diamond 於草叢中以九秒九之速度竄出,
向著媽媽這邊跑過來, 噢!! 好好乖女兒啊!!!
慢着......diamond你左眼中一抹紅燄是......血!!!!!
馬上用清水沖走表面血水, 細看下大吃一驚!
小diamond 眼中淌著血!!! 眼球因充斥著血液而變得暗紅色,
高聲呼喊: JJ 回家了. 好乖女 JJ 馬上跑回來.
一人二狗沿着回頭路急步折返, 自己暗自盤算著下一步要做的事情.
上車, 馬上致電獸醫, 即飛馳到旺角,
到達診所, 心一涼: 為何平時註診當值之兩位醫師均不在?
硬著頭皮要看一位新的醫師, 不妙啊!! 醫師說有異物要開刀.
且不保証開刀會不損害視力, 甚至有機會盲!! 不...立即閃.
再致電狗狗好友Salina, 向她求救,
不一會, 她便像百科全書般如數家珍地向我提供各界獸醫名單.
真的令我很感動!! 謝謝 Salina!!
 馬上去看另一位醫師吧.經過麻醉後詳細檢驗, 醫師看不見diamond 眼中有異物,
但他強調, 看不見不等如沒有, 而現時眼球創傷頗大,
充血情況嚴重令眼壓太大有可能導致青光眼,
若眼內不幸有異物亦會引起炎症亦有可能致盲.
若不幸要動手術的話, 因手術造成的創傷亦有致盲的可能性,
天啊!!!! 很嚴重的情況啊!!
但醫師叮囑, 現時暫未有任何事可以做,
只好減去眼壓, 排水, 消炎, 避免發生炎症.
觀察幾天再覆診.
藥中有類固朜, 有抗生素,
很不願意餵 Diamond 吃這些有重副作用之毒藥,
但又沒有法子, 媽媽很心痛啊.
Diamond, 你要努力呀!!
8월 20일 今日去狗公園參加唐狗會活動上個星期五去完labclub 私人船河, 今日又去狗公園開唐狗派對, 好開心呀!
今日好多唐狗呀, 雖然有d個樣好似diamond, 有d好似jade,
唐唐隻隻都唔會一樣, 真係有好多唔同款式, 好正呀.
大草地喪跑, 食吓野, 狗狗游水.
今日查查又懶勁啦, 佢恃住自己有三腳貓泳術, 係眾多唔鍾意游水嘅唐狗面前狂跳水呀!
佢平時係d lab面前唔會咁架! 不過上個星期五船河果日佢都游得好勁,
會自己游出去深水唔到地的地方.
而今日帶左diamond 最深愛的"芒刺"玩具, 所以佢都要跳落水追芒刺呀.
而jade 就唔鍾意游啦, 唯有夾硬抱佢落水啦. 好似放船仔咁慢慢放,
唔敢掉佢落水呀, 唔想佢驚左游水呢種咁好嘅運動.
因為第時如果佢地老左有關節病行唔郁, 好多時都要靠水療先可以強化佢地d肌肉,
所以一定要識游水呀. 如果唔係第時會少一個治療的方法.
游完水有遊戲玩, 雖然無贏到獎品, 但玩吓都好開心架.
8월 13일 8號風球打風造成人命傷亡, 經濟損失, 作為一個有良知的人,
一定唔可以話打風係一件賞心樂事,
但我細個時又真係好鐘意打風......
從小喜愛打風. 打大風可以唔番學,
記得細個2年班番上晝班, 掛左8號波都唔知,
細個又唔識開收音機或開電視睇吓咩風球,
自己起身番學出門口, 出左門口先有個好心太太話我知唔洗番學,
記得當時屋企外面條走廊好靜, 呢一幕好印象深刻.
而家回想起, 咁細個就自己搭巴士由華富村到香港仔番學, 諗番都覺得危險.
打大風可以落街玩, 踩roller 唔洗自己用力踩就咁比風吹都吹得郁.
同好鄰居成班街童落雨絲濕玩"伏匿匿", 要"埋周", 著住人字拖跑呀跑,
落雨地下跣, 成個額頭砍落鐵欄隻角度, 立即頭破血流,
當時一D都唔覺得痛, 亦唔怕跌破相, 只覺好好玩,
事後, 眼眉上的疤痕成永久烙印, 印證着自己頑劣事跡.
打大風屋企無冷氣都好涼爽, 聽住d風係窗邊發出嗚嗚聲,
頓時覺得屋企有d熱鬧氣氛, 這些都是我兒時值得回味的快樂回憶.
上星期五終於都打8號風球啦. 帕布去了又來, 始終要到此一遊.
當日都要番工, 好在番早, 又好在果朝落大雨, 又call唔到車, 迫住要揸車番工,
放工落機即刻掛8號波. 又揸番車番屋企.
由機場出市區, 係青馬橋收費廣場開始塞車,
啊.....行青馬橋塞車真係第一次呀!
第一次覺得塞車好好玩, 有熱鬧的感覺,
慢駛至青衣北岸公路, 好不容易車先行到青衣站,
打比ringo, 約左佢放工係青衣站等.
佢話係太子站月台等左十幾班車先上到地鐵, 好誇張呀!
好難想像個月台可以逼到幾多乘客.
仲勁過新年行花市呀. 8월 12일 今日大雨中去火炭狗場今日都係一個月一次嘅搬糧日, 好在今日只搬貓沙, 同埋人手充足, 所以有時間同d狗沖涼.但等送貨都等到兩點幾先到, 可能落雨塞車啦, 到左之後先有得搬.
今日都係同舊場果邊d狗沖, 因為shirley 佢地主力做新場果邊, 我地就做另一邊.
加上今日只搬貓沙, 貓沙全部送去新場果邊, 所以我地都係唔好阻礙佢地搬運工作啦.
今日同bobo 沖涼, 打開佢個口, 唉...成口牙石, 好似d鐘乳石咁, 多到連本身d牙都睇唔到.
我用手試吓刮走d牙石啦....."卜" 一聲, 真係有舊牙石可以就咁搣出黎.
但隨之就見到牙肉邊流血啦, 好肉赤佢d牙咁差.
我係屋企日日都同4個女刷牙, 但點解bobo 身為一隻名種班點狗都淪落得如此下場呀?
我好登佢唔甘心, 但偏偏佢個傻仔又咁乖咁聽話又鍾意痴人好討人歡心.
佢係狗場, 咁靚隻狗真係嘥左佢.
8월 8일 妄想症大肚婆唔要自己隻狗的理由:
驚第時個bb 會敏感.
驚第時隻狗會妒忌.
驚第時隻狗會發惡.
驚第時............
十萬個理由全部都係自己憑空想像, 自己創造出黎.
你咩都驚你唔驚自己生舊义燒出黎, 你去死啦!
8월 7일 去接番coffee 番去約左shirley 5點係荃灣跟住一齊去接coffee 啦.
去到, 一切好順利, coffee 都係有d驚, 唔肯出籠, 唔肯行.
SAA 職員幫我地抱佢出黎, 再抱埋上車.
佢地真係好好, 個個職員都好熱心, 真係好有heart,
攪到我有d想加入成為佢地一份子.
呢樣野, spca 係搵唔到.
上到車, 向職員道別了. 向coffee 安慰一番,
竟發現coffee 好似沖左涼咁, 個身好乾淨呀,
最厲害係, 連腳板底d毛都好似剪左咁呀!
coffee即刻乾淨晒唔似乞兒仔咁呀.
歸家路上, coffee 都好攰, 可能d麻醉未散晒.
佢一路都瞓係後座無郁過, 真係超乖.
車到青衣啦. 落地啦, 佢好唔願意離開車廂呀.
可能呢一覺係佢一生中瞓得最舒服嘅一覺.
自己個身乾乾淨, 係車度有泠氣, 有梳化軟淋淋,
比起佢平時瞓係街度硬轟轟, 熱辣辣, 又有其他狗係度狂吠嘈住晒,
呢一覺佢真係唔捨得起身.我叫左好耐佢都唔肯自己落地.
事後coffee帶返胡太家, 由天堂返回地獄, 再加上手術後要戴頭罩,
佢好唔開心.
唉....你下一世要識投胎啦.
.
呢個TNR計劃 真係可以幫到D狗狗,
SAA保護遺棄動物協會 捕捉‧絕育‧放回朝早起身, 攪掂4個女, 就出發去胡太度.
約左Shirley 係青衣站等, 一齊上去, 又係滂沱大雨, 濕晒.
去到, 見到胡太同佢一對仔女, 帶coffee 女出黎,
coffee 好驚, 佢以為要帶佢去死, 係咁抓住個地唔肯行.
係咁扯都唔郁, 問胡太可唔可以一齊行落去車度,
因為有熟人對隻狗會好d安定d.
但佢叫佢個女, 佢個女又唔肯, 行落去幾步都唔肯, 唉!
個心好慶, 心諗就係你呢d連小小責任都唔肯負,
行幾步路都唔肯的人所作嘅孽, 令到咁多狗要受苦.
要我向隻狗夾硬黎先拉得郁佢.
coffee 好傷心, 佢一定係見過有捉狗隊黎捉狗,
所以佢先咁驚. 佢仲驚到賴便便同嘔白泡,
我好心疼.
抬佢上車, 佢無郁黎郁去, 佢就咁扒係個後座郁都唔郁一直由青衣去到元朗,
佢好傷心的表情, 佢以為我地帶佢去啪, 佢喊, 佢有眼淚流出, 咁有性的狗狗, 見到我都好肉赤.
去到, 辦入院手續, 佢地d staff真係好nice, 同上次spca 果d爭好遠.
但好明顯, saa 都好窮吓, 而 spca 真係好有錢.
同狗狗磅重, 見醫生姑娘, 安頓好, 我同shirley 便回家休息一下,
一陣6點再去接番coffee 番去.
蕩失路禽日約左 BOBO去寵物綠洲, 因為佢話包場,
我未玩過包場, 所以都好呀, 約埋一齊去玩, 不過禽日綠洲真係好多人呀!
游完水之後, Ringo 同我車一轉去SAA 個地埗.
因為我聽日要帶胡太門口隻狗女去, 我驚唔識去.
今日係屋企食完飯之後, 我又再擔心唔識路,
我真係對認路好無信心, 於是又車多轉.
所以我聽日都應該OK 唔會蕩失路掛. 「捕捉‧絕育‧放回」計劃 心情有d緊張, 聽日就帶胡太門口隻狗女去saa 絕育.
上次帶胡太屋企2隻狗女去spca 絕育都好d,
因為起碼spca 好似近d. 同埋上次有胡太一齊去,
狗狗係車度會安定d.
今次去saa 要去到元朗白沙村,
對於我呢d路盲, 唔識路之人, 帶住隻陌生街狗,
真係有d壓力.
仲要今次胡太無話一齊去, 佢好似開始有d唔想理,
好在今次有shirley 幫手一齊去, 如果唔係都唔知點算.
係車度, 狗狗實好緊張, 佢地實郁黎郁去,
仲好大可能會係車度賴屎, 因為上幾次都試過.
所以如果得自己一個一定唔掂呀,
希望聽日一切順利啦.
8월 3일 無病呻吟之小願望見呀妹個blog 寫要努力工作實現佢嘅小願望, 自己又諗吓, 自己又有咩願望呢?諗黎諗去, 諗唔到. 仲記得細個好似有d想要個melody公仔文具筆盒,36色斯得樓帆船牌木顏色筆之類嘅願望,因為細個零用錢有限, 邊可以話想要呢樣就有呢樣呀! 到後來出黎做野, 真係自己走去文具鋪買盒顏色筆滿足一下自己.而家人真係大個左啦, 仲會唔會咁呢? 唔會啦.......點解? 因為原來人大左好多願望都只係一個願望,明知永遠都唔會實現的, 於是所有願望都演變成為奢望, 唔再繼續諗落去.反而退而求其次, 爭取一d可以掌握係手嘅事.既然係咁, 仲點會有願望呢? 但沒有願望, 沒有夢想的人生, 又值得慶賀嗎?無風浪是好是壞? 白開水是淡而無味, 還是清純無添加?辛苦工作是福是禍? 請大家唔好再講: "比起有d人, 你有得做已經好好" 同 "起碼你四肢健全有能力去做" 呢d廢話.我四肢健全但個心理好唔健全, 又有人會可憐我嗎? 我發脾氣是錯, 但受氣又是對嗎?我只係云云眾生如螞蟻般的活物. |
|
|
